ShQO qutqarýshylary meıram kúnderi 7 ret kómekke attandy

ÓSKEMEN. QazAqparat – Shyǵys Qazaqstan oblysynyń qutqarýshylary 19-23 naýryz aralyǵynda túrli qıyndyqqa tap bolǵandarǵa 7 ret kómekke attandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 20 naýryzda qutqarýshylar Rıdder qalasynyń turǵynyn garajdaǵy jertóleden alyp shyqty. Ol birden jedel járdem dárigerlerine tapsyryldy.

«Sol kúni Óskemendegi Kosmıcheskaıa kóshesinde turatyn áıel adam habarlasyp, kómek surady. Ol isingen saýsaǵynan saqınany sheshe almaǵan. TJD qyzmetkerleri turǵynǵa kómektesti», - delingen aqparatta.

21 naýryzda Óskemen qalasyndaǵy Protozanov kóshesinde er adam óz-ózine qol jumsamaq bolǵan. Qutqarýshylar garajdyń qaqpasyn arnaıy quralmen ashyp, azamatty syrtqa shyǵaryp, alǵashqy medıtsınalyq kómek kórsetti.

Sol kúni Semeıde kishkentaı balanyń ata-anasy «112» qyzmeti qońyraý shaldy. Oqıǵa ornyna shuǵyl jetken qutqarýshylar balanyń qysylyp qalǵan saýsaǵyn plastıkalyq qaqpaqtan shyǵardy.

Sondaı-aq departament qyzmetkerleri osy kúnderi qulyptalyp qalǵan esikterdi ashýǵa kómek kórsetti.