ShQO qutqarýshylary qar kóshkininde qalǵan Aıaz ata men Aqshaqarǵa kómektesti

ÓSKEMEN. QazAqparat – Shyǵys Qazaqstan oblysynyń qutqarýshylary qar kóshkininiń qaýpin túsindirý maqsatynda erekshe shara ótkizdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha 497 jol ýchaskesinde kóshkin júrý qaýpi bar. Onyń ishindegi 336-sy obektiler men turǵyndarǵa qaýip tóndiredi. Jańa jyl qarsańynda tótenshe jaǵdaılardyń aldyn alý úshin qutqarýshylar erekshe shara ótkizdi.

«Ańyz boıynsha Aıaz ata men Aqshaqar syılyqtaryn alyp shanaǵa minip, jolǵa shyqqan. Eldi mekenderden alystaǵan olar qutqarýshylardyń kóshkin qaýpi týraly eskertýlerin eskermeı, taýǵa qaraı ketken. Sóıtip, kóshkinge tap boldy. Qutqarýshylar olarǵa kómek kórsetý úshin jedel kelip jetti. Labrador ıtterdiń kómegimen qar qursaýynda qalǵan ertegi keıipkerleri tabyldy», - delingen aqparatta.

Apattar medıtsınasy ortalyǵynyń dárigerleri Aıaz ata men Aqshaqardy tekserip, aýrýhanaǵa jatýdyń qajettiligi joqtyǵyn aıtty. Qutqarýshylar olarǵa túsindirý jumystaryn júrgizip, barynsha abaı bolý kerektigin eskertti.

Esterińizge sala ketsek, osyǵan deıin ShQO qutqarýshylary zombıdiń keıpine engen bolatyn.