ShQO qutqarýshylary ǵaryshtan baqylaý arqyly 80-ge jýyq órttiń taralýyn tejedi

ÓSKEMEN. QazAqparat – Shyǵys Qazaqstan oblysynyń qutqarýshylary ǵaryshtan baqylaý arqyly 77 órttiń taralýyn ýaqtyly tejedi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirde aptap ystyq jalǵasýda. 8 maýsymda aýa temperatýrasy 41 gradýsqa deıin kóteriledi dep kútilýde. Osy rette, qutqarýshylar turǵyndarǵa órt qaýipsizdigi erejelerin qatań saqtaý qajettigin eskertýde.

«Órttiń aldyn alý maqsatynda órt sóndirýshiler, ormanshylar, polıtsııa, jergilikti atqarýshy organ ókilderi qatarynan 46 mobıldi top qurylǵan. Profılaktıkalyq reıdter nátıjesinde zań buzǵan 32 adam anyqtalyp, ákimshilik jaýapkershilikke tartyldy», - deıdi oblystyq TJD memlekettik órt baqylaý basqarmasynyń bastyǵy Nurjan Ómirjanov.

Otty bastapqy kezeńde anyqtap, jedel aýyzdyqtaý úshin qutqarýshylar ǵarysh arqyly monıtorıng jasaıdy. Búgingi tańda ǵaryshtyq tehnologııalardyń kómegimen 77 órttiń taralýy ýaqtyly tejeldi.

«Dala órti negizinen azamattardyń otty abaısyz qoldanýynan jáne qarapaıym qaýipsizdik sharalaryn buzýynan shyǵady. Sondyqtan halyqty barynsha saq bolýǵa shaqyramyz. Ormanda múlde ot jaǵýǵa bolmaıdy. Balalarǵa sirińkemen oınaýdyń qaýiptiligi týraly túsindirý kerek», - dedi N.Ómirjanov.