ShQO qutqarýshylary balalar qamalyp qalǵan 120-dan astam úıdiń esigin ashty
ShQO Tótenshe jaǵdaılar departamenti baspasóz qyzmetiniń málimetine súıensek, bıyl qutqarýshylar ishten qulyptalyp qalǵan 239 úıdiń esigin ashyp bergen. Onyń ishindegi 120-dan astam úıde balalar qamalyp qalǵan.
«Mamyr aıynyń basynan beri TJD qyzmetkerleri Óskemen, Rıdder qalalary men Zaısan aýdanynda 8 úıdegi balalarǵa kómekke keldi. Olar adam ómirine qaýip tóngen kezderde ǵana esikterdi ashady. Ómirge qaýip tóngen jaǵdaılarǵa – elektr jabdyqtary, jylytý qurylǵysy qosýly qalǵan úıde balalar qalǵan oqıǵalardy jatqyzamyz. Bunyń saldary órtke nemese jazataıym oqıǵaǵa ákelip soǵýy múmkin», - delingen aqparatta.
Osy rette, departament qutqarýshylary balalary bar turǵyndarǵa úıdiń syrtqy esigine ózdiginen jabylatyn qulyp ornatpaýǵa keńes beredi.
Esterińizge sala ketsek, osyǵan deıin ShQO-da azyq-túlik baǵasyn ósirgen kásipkerler jazalanatynyn habarlaǵan edik.