ShQO qutqarýshylary aptap ystyqqa baılanysty sý aıdyndarynda baqylaýdy kúsheıtti

ÓSKEMEN. QazAqparat – Shyǵys Qazaqstan oblysynda aptap ystyqqa baılanysty qutqarýshylar sý aıdyndarynda baqylaýdy kúsheıtti, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, óńirde kesheli beri synap baǵanasy 30 gradýstan túspeı tur.

Soǵan oraı halyq jappaı sý aıdyndarynyń jaǵasyna aǵylyp jatyr. Qaýipsizdik maqsatynda qutqarýshylar sý aıdyndaryn patrýldep júr.

Shomylý maýsymy bastalǵaly beri barlyǵy 100-ge jýyq profılaktıkalyq reıd júrgizildi.

Tájirıbe kórsetkendeı, jazataıym oqıǵalar kóbinese shomylýǵa ruqsat etilmegen jaǵajaılarda bolady.

Sondyqtan mamandar halyqqa túsindirý jumystaryn júrgizip, sýǵa túsýge tyıym salynǵan jerlerge eskertý belgilerin ornatýda.

«Aptap ystyq bastalysymen baqylaýdy kúsheıttik. Qaıyqpen demalýshylar jıi baratyn jetýi qıyn oryndarǵa da aralap jatyrmyz. Mundaı baqylaý sý aıdyndaryndaǵy qaıǵyly oqıǵalardy azaıtýǵa septigin tıgizedi», - deıdi oblystyq TJD bastyǵynyń orynbasary Arman Toqanov.

Oblys ákimdiginiń jańa qaýlysy boıynsha bıyl óńirde shomylýǵa arnalǵan 21 ýchaske belgilendi.

Al 74 ýchaskede sýǵa túsýge tyıym salynǵan.