ShQO kásipkerleri mektepterge mıllıondap qarjy bólmek
Aýqymdy jıynda sóz sóılegen oblys ákimi Danıal Ahmetov barlyq iri kásiporyndardyń basshylaryna, shaǵyn jáne orta bıznestiń tizginin ustaǵan azamattarǵa alǵysyn bildirdi.
«Oblystaǵy kásipkerler óńirdiń damýyna óte úlken úlesterin qosyp keledi. «Rýhanı jańǵyrý» baǵdarlamasy aıasynda oblysymyzda «Meniń mektebim» atty jobanyń bastaý alatynyn aıtqym keledi. Ol jospar boıynsha aımaqtaǵy barlyq mektepterin zamannyń ozyq bıologııa, hımııa, fızıka jáne robototehnıka kabınetterimen jabdyqtaýdy kózdeımiz. Óńirdegi barlyq bilim ordalary Nazarbaev Zııatkerlik mektebinen kem bolmaýy kerek», - deıdi Danıal Ahmetov.
Kásipkerler aımaq basshysynyń bastamasyna qoldaý bildirip otyr. Máselen, Zaısan aýdanynan kelgen kásipker áıel óz aýylyndaǵy mekteptiń robototehnıka kabınetin jaraqtandyrý úshin 3 mln teńge qarajatty qazir bólýge ázir ekenin bildirdi. Onyń izinshe, basqa da kásipkerler qarajat bólýge daıyn ekendikterin aıtýda. «Atymtaı Jomarttardyń» arasynda osy baǵytta 50 mln teńge bólgeli otyrǵandary da bar. Al Óskemenniń kásipkerleri joba aıasynda 106 mln teńge bóletinin málim etti.
Kásipkererdiń barlyq jınalǵan aqshasy «Paryz» atty oblystyq qorǵa jınalyp, qarajat sol qordan mektepterge baǵyttalatyn bolady.
FOTO: Óskemen qalasynyń baspasóz qyzmetinen alyndy.