ShQO-ǵa keletin týrıster sanyn arttyrý úshin Marqa kólinde halyqaralyq joba qolǵa alynady
Bul týraly búgin QR Prezıdenti janyndaǵy Ortalyq kommýnıkatsııalar qyzmetiniń kóshpeli baspasóz konferentsııasynda Shyǵys Qazaqstan oblysynyń ákimi Ermek Kósherbaev málim etti.
— Óńirdiń týrıstik tartymdylyǵyn arttyrý úshin brendtik sharalar ótkizip kelemiz. Sonyń ishinde «AltaiFest — Órleý» jazǵy festıvali jáne «Shyǵys Salburyny» búrkitshiler festıvalin atap ótkim keledi. Budan bólek, Bozanbaı aýylynda ulttyq sport túrleriniń quzyrettilik ortalyǵy ashylyp jatyr. Ony álemge áıgili búrkitshi qyz Aısholpan basqarady. Rıdder qalasynda belsendi demalys jáne taý shańǵysy sportymen shuǵyldanýǵa arnalǵan klaster qalyptastyrýdy josparlap otyrmyz. Al Katonqaraǵaı aýdanynda 4 juldyzdy qonaq úı salynady, — deıdi ol.
Qolǵa alynǵan sharalar jyl basynan týrıstik saladaǵy ınvestıtsııalar kólemin 23%-ǵa, qonaqtardy ornalastyrý 50%-ǵa, al demalýshylar sanyn 20%-ǵa arttyrýǵa múmkindik berdi.
Budan bólek, Marqa kólinde biregeı halyqaralyq týrıstik jobany júzege asyrý josparlanyp otyr.
— Qytaıdaǵy Qanas jáne Shyǵys Qazaqstan oblysyndaǵy Marqa kólderin bir týrıstik baǵytpen baılanystyrý kózdelýde. Qazirgi tańda QHR Shyńjań-Uıǵyr avtonomııalyq aýdanyndaǵy Qanas kóline jyl saıyn keletin ishki týrıster sany 10 mln-nan asady. Onyń jer bederi men tabıǵaty Marqakólmen uqsas keledi. Biraq Shyǵys Qazaqstandaǵy kól odan birneshe ese úlken. Sondyqtan onyń týrıstik áleýeti de joǵary. Ókinishke qaraı, Marqakólde áli qajetti ınfraqurylym joq. Degenmen tabysty jumys istep turǵan týrıstik jobamen baılanys ornatý kelýshiler sanyn arttyrýǵa úles qosatyn bolady. Jobanyń biregeıliginiń arqasynda myńdaǵan týrısti tartýǵa múmkindik týady. Qazir Terekti aýyly mańynda jańa shekara ótkelin ashyp, kólge tikeleı jol salý máseleleri talqylanýda, — deıdi Ermek Kósherbaev.
Eske salsaq, budan buryn ShQO-daǵy dándi jáne maıly daqyldardyń ónimdiligi 25 paıyzǵa artqany habarlandy.