ShQO ekologtary zaýyttan shyqqan qyzǵylt tútinniń sebebin túsindirdi

ÓSKEMEN. QazAqparat – Óskemen qalasyndaǵy Tıtan magnıı kombınatynyń tóbesinde paıda bolǵan qyzǵylt tútinge qatysty ekologtar túsinik berdi, dep habarlaıdy QazAqparat tilshisi.

ShQO ekologııa departamentiniń basshysy Danııar Álıevtiń aıtýynsha, aldyn ala málimet boıynsha qyzǵylt tútinniń shyǵýyna – hloratorly tsehtyń 4 qubyrynyń bir ýaqytta tazalanýy sebep bolǵan.

«Qubyrlardy quramynda hlor bar reagentterden tazartý jumysy júrgizilip jatqan. Sonyń saldarynan qyzǵylt tútin paıda boldy. Kásiporyn ókilderi bizge tútinniń kóp bolmaǵanyn aıtty. Qazirgi ýaqytta arnaıy qurylǵan komıssııa bunyń aq-qarasyn anyqtap jatyr», - deıdi ol.

Danııar Álıevtiń sózinshe, búginde kásiporynda tekserý jumystary jalǵasýda.

Sondyqtan ekologtardyń naqty qorytyndysy tıisti sharalar aıaqtalǵannan keıin ǵana shyǵady.

Esterińizge sala ketsek, osyǵan deıin Óskemendegi zaýyt tóbesinde qyzǵylt tútinniń paıda bolǵany habarlanǵan.