ShQO ekologtary rýda tıelgen vagondar qulaǵan ózen sýyna zertteý júrgizdi

ÓSKEMEN. QazAqparat – Shyǵys Qazaqstan oblysynyń ekologtary rýda men shlag tıelgen birneshe vagon qulap ketken ózen sýynan synama aldy, dep habarlaıdy QazAqparat tilshisi.

3 sáýir kúni saǵat 12.04-te Óskemen-Kúmistaý temirjol ýchaskesinde júk poıyzynyń 18 vagony relsten shyǵyp ketken.

Onyń altaýy Ertis ózenine qulady. Bes vagonda shlak, bireýinde rýda tıelgen.

Atalǵan fakti boıynsha ShQO Ekologııa departamentiniń mamandary oqıǵa ornyna baryp, Ertis ózeniniń joǵary jáne tómengi aǵysynan sý synamalaryn aldy.

«Zertteý nátıjelerine sáıkes, synamada myryshtyń ruqsat etilgen shekti kontsentratsııasynyń 1,3 ese artqany anyqtaldy. Ózenniń tómengi aǵysynan alynǵan synamada mys kontsentratsııasynyń 1,5 ese, joǵary aǵysynda 1,3 ese óskeni baıqalyp otyr. Endi apta saıyn Ertis ózeniniń sýyna monıtorıng júrgiziletin bolady», - dep habarlady departamenttiń baspasóz qyzmeti.

ShQO boıynsha kólik prokýratýrasynyń talaby boıynsha «QTJ – Júk tasymaly» AQ-nyń Semeı bólimshesine qatysty jospardan tys ekologııalyq tekserý taǵaıyndaldy. Sonyń nátıjeleri boıynsha apattyń saldaryn joıý jónindegi is-sharalar belgilenedi.

Esterińizge sala ketsek, osyǵan deıin Shyǵys Qazaqstanda júk tıelgen 18 vagonnyń relsten shyǵyp ketkeni habarlanǵan bolatyn.