ShQO Ekologııa departamenti basshysynyń orynbasary para aldy dep aıyptaldy
ShQO Sybaılas jemqorlyqqa qarsy qyzmeti Ulttyq qaýipsizdik komıtetiniń oblystyq departamentimen jáne prokýratýramen birlesip, jasyryn tergeý áreketteriniń nátıjeleri boıynsha óńirlik Ekologııa departamenti basshysynyń orynbasaryn para aldy degen kúdikpen ustady.
«Ol QR ÁQBtK-niń 328-baby 4-bóligi (Qorshaǵan ortaǵa jol beriletin antropogendik áser etý normatıvterin buzý) boıynsha óńirdegi kásiporyndardyń birin ákimshilik jaýapkershilikke tartpaǵany úshin iri kólemde para aldy degen kúdikke ilindi. Qazirgi ýaqytta sot sanktsııasymen kúdikti qamaýǵa alyndy. Qylmystyq-protsestik kodeksiniń 201-babyna sáıkes tergeý múddesi úshin ózge aqparat jarııa etýge jatpaıdy», - dep habarlady Sybaılas jemqorlyqqa qarsy is-qımyl agenttigi ShQO boıynsha departamentiniń baspasóz qyzmeti.
Vedomstvo dereginshe, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.