ShQO densaýlyq saqtaý salasynda 697,8 mln teńge ıgerilmegen

ÓSKEMEN. QazAqparat - Shyǵys Qazaqstanda 2018 jyly 1,4 mlrd teńge ıgerilmeı qalǵan. Onyń teń jartysy densaýlyq saqtaý salasyna tıesili, dep habarlaıdy QazAqparat tilshisi.

Oblys ákimdiginde ótken jyldyń bıýdjetin ıgerý boıynsha qorytyndy májilis ótti. Qarjy basqarmasy basshysynyń mindetin atqarýshy Merýert Ahmetnabıevanyń aıtýynsha, respýblıka bıýdjeti men jergilikti qazynadan bólingen qarajattan 1,4 mlrd teńge ıgerilmeı qalǵan. Basym bóligin oblystyq transfert qurap otyr. Respýblıkalyq bıýdjetten ıgerilmegeni - 17 mln teńge ǵana.

Qarjy ıgermeý reıtınginde kóshtiń basyn densaýlyq saqtaý basqarmasy eshkimge beretin emes. 697,8 mln teńge ıgerilmegen. Odan keıingi orynda energetıka jáne kommýnaldyq sharýashylyq basqarmasy. Shaǵyn jáne orta bıznes nysandaryna ınfraqurylym tartý úshin bólingen 94,2 mln teńge qazynaǵa qaıtqan. Úshtikti mádenıet basqarmasy túıindep tur. Igerilmegen soma - 65,4 mln teńge.

Aýdandar men qalalar arasynda qarjy ıgerýge qyrsyz óńirlerdiń kósh basynda Óskemen qalasy tur. Oblys ortalyǵynyń ákimdigi 346,9 mln teńgeni jarata almaǵan. Odan keıingi oryndarǵa Borodýlıha men Jarma aýdandary jaıǵasypty.