ShQO dárigerleri naýqastyń ómiri úshin on saǵat boıy kúresti
Densaýlyq saqtaý mınıstrliginiń málimetinshe, patsıent kardıologııadaǵy eń kúrdeli dıagnozdardyń birimen shuǵyl túrde Shyǵys Qazaqstan oblystyq aýrýhanasyna tústi.
51 jastaǵy er adam ózin kóshede jaısyz sezingen, alaıda kóligine minip, áıeline qońyraý shalady. Infarkt sımptomdarymen «jedel járdem» kóligimen aýrýhanaǵa jetkiziledi, jasalǵan koronarografııanyń kómegimen ınfarkt rastalmady.
KT-nyń nátıjeleri boıynsha aortanyń qatparlanýy dıagnozy qoıyldy. Dárigerlerdiń aıtýynsha júrekten jambasqa deıin búkil tamyr zaqymdanǵan. Mundaı patologııa qolqanyń sózsiz jyrtylýyna, sondaı-aq jıi jaǵdaıda ólimge ákeledi.
Er adam operatsııa ústelinde ólim aýzynda boldy. Túni boıy kardıohırýrgtar Dastan Qadyrbaev, Shyńǵys Baltabekov, anestezıolog Oljas Rahymǵalıev, perfýzıolog Áset Nurahatov kúrdeli operatsııa jasady. Operatsııa 10 saǵatqa sozyldy. Patsıent jasandy qan aınalymyna qosyldy, onyń denesi 29 gradýs Tselsııge deıin salqyndatyldy. Aortadan basqa, aorta qaqpaqshasy da zaqymdanǵan eken. Ol mehanıkalyq qaqpaqshaǵa aýystyryldy. Dárigerler aortanyń barlyǵyn derlik jasandy tamyrǵa aýystyrdy. Oń jaq buǵanaasty arterııasynan uıyǵan qan alyndy. Tek tańǵy saǵat 8.00-de ǵana sharshaǵan, biraq ózderine dán rıza hırýrgtar brıgadasy operatsııa bólmesinen ketti.
«Dárigerler tańqalarlyq keremet jasady. Meniń ómir súrý múmkindigim óte az bolǵanyn bilemin. Biraq men ózim úshin emes, jaqyndarym men balalarym úshin alańdadym. Dárigerler meniń ómirimdi saqtap qana qalǵan joq, sonymen qatar týystarymdy da qasiretten aman alyp qaldy. Osy túni men úshin alańdaǵan jandardyń barlyǵy – áıelim, ata-anam, balalarym, dostarym, synyptastarym bizdiń qalamyzda naǵyz mamandar bar ekenin túsindi», - deıdi rızashylyq bildirgen patsıent Bolat Kalıakperov
ShQO oblystyq aýrýhanasynyń kardıohırýrgy Dastan Qadyrbaevtyń aıtýynsha, operatsııa jaı ǵana kúrdeli bolǵan joq - bul kúrdeliliktiń eń joǵary deńgeıi boldy.
«Júrgizilgen hırýrgııalyq aralasý óte aýyr - kúrdeliliktiń jetinshi deńgeıi – búkil deńgeıdiń eń joǵary deńgeıi boldy. Ókinishke oraı, medıtsınanyń barlyq jetistikterine qaramastan mundaı patologııadaǵy ólim deńgeıi óte joǵary. Biraq biz bul patsıentti aman alyp qaldyq», - dep atap ótti Dastan Qadyrbaev.
Operatsııadan soń eki apta ótkennen keıin er adam ózin jaqsy sezine bastady, dárigerler onyń jaǵdaıyn qanaǵattanarlyq dep baǵalaıdy. Ári qaraı ońaltý ortalyǵynda emin alyp, ońaltýdan ótetin bolady.