ShQO-daǵy jol apaty: kólikke qystyrylyp qalǵan er adam qutqaryldy

ÓSKEMEN. QazAqparat – Shyǵys Qazaqstan oblysynda jol apatynda kólikke qystyrylyp qalǵan er adamǵa qutqarýshylar kómekke keldi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, jol-kólik oqıǵasy Úrjar aýdanyndaǵy «Maqanshy-Keldimurat» tasjolynyń 10-shy shaqyrymynda bolǵan.

«Mitsubishi Space Wagon» jáne «Lada Priora» markaly avtokólikter soqtyǵysty. Sonyń saldarynan «Mitsubishi» kóliginiń júrgizýshisi temirge qystyrylyp, shyǵa almaı qalǵan. Kóp uzamaı oqıǵa ornyna qutqarýshylar kelip jetti.

«№54 órt sóndirý bóliminiń qyzmetkerleri eki avtotsısternanyń kómegimen kólik shanaǵyn sozyp, 1978 jylǵy er adamdy shyǵaryp aldy. Zardap shegýshi birden jedel járdem qyzmetkerlerine tapsyryldy», - delingen aqparatta.