ShQO-daǵy jer úılerde órt qaýipsizdigin buzýdyń 99 230 faktisi anyqtaldy
12:28, 24 Naýryz 2022
ÓSKEMEN. QazAqparat – Shyǵys Qazaqstan oblysyndaǵy turǵyn úılerde órt qaýipsizdigi talaptaryn buzýdyń 99 230 faktisi anyqtaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt shyǵýynyń jáne azamattarǵa ıis tııýdiń aldyn alý úshin jeke turǵyn úı sektorynda keń aýqymdy aldyn alý jumystary júrgizilýde.
«Jylytý kezeńiniń basynan beri TJD qyzmetkerleri 423 567 úıdi aralap shyqty. Belgili bolǵandaı, halyqtyń kóbi peshti buzýshylyqtarmen paıdalanady. Turǵyn úılerde órt qaýipsizdigi talaptaryn buzýdyń 99 230 faktisi anyqtalǵan. Onyń ishinde 45 311-i peshti paıdalanýǵa baılanysty bolyp otyr», - delingen aqparatta.
Aıta keteıik, departament mamandary júrgizgen usynymdar men nusqaýlyqtardyń arqasynda 17 816 buzýshylyq sol jerde joıyldy.