ShQO-daǵy jer úılerde órt qaýipsizdigin buzýdyń 25 myńnan astam faktisi anyqtaldy

ÓSKEMEN. QazAqparat – Shyǵys Qazaqstan oblysyndaǵy jer úılerde órt qaýipsizdigi talaptaryn buzýdyń 25 myńnan astam faktisi anyqtaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar turǵyn úı sektoryn aralap, tekserý júrgizdi. Mundaǵy maqsat – elektrmen jylytý quraldaryn jáne peshti paıdalaný kezinde shyǵatyn órtterdiń aldyn alý.

«Búgingi tańda barlyǵy 58 168 jer úı tekserildi. Onyń ishinde halyqtyń áleýmettik osal toptary turatyn 8172 úı bar. Sonyń nátıjesinde, órt qaýipsizdigi erejelerin buzýdyń 26 354 faktisi anyqtaldy. Atap aıtqanda, jylytý júıesine baılanysty – 10 748, elektr jabdyqtaryn paıdalanýǵa qatysty – 9505, basqa da buzýshylyqtar – 6101. Qazirde 3976 olqylyqtyń orny tolyqtyrylǵan», - dep habarlady vedomstvo ókilderi.

Sondaı-aq reıd barysynda departament mamandary turǵyndarǵa túsindirý jumystaryn júrgizip, jadynamalar taratty.