ShQO-daǵy zeınetker 3 dóńgelekti velosıped qurastyrdy
07:23, 07 Tamyz 2017
ASTANA. QazAqparat - Shyǵys Qazaqstandaǵy Besqaraǵaı aýylynyń turǵyny Valerıan Ryjkın úsh dóńgelekti velosıped qurastyryp shyqty, dep jazady 24kz.
Búginde birneshe aı qatarynan eńbektengen jumysynyń rahatyn kórip júr. Salmaǵy shamamen 20 keli bolatyn velosıped tebýge yńǵaıly ári jelge qarsy saǵatyna 10 shaqyrymǵa deıin jyldamdyqpen júre alady.
67 jastaǵy zeınetker ózi oılap tapqan kóligin kóbine dúkenge azyq-túlik alýǵa, keıde kórshi aýyldarǵa da baryp kelý úshin paıdalanady.
«Ónertabys ózime de, ózgelerge de unaıdy. Jolda ketip bara jatsam, kólikter toqtap, qyzyqtap qarap jatady. Maǵan kóbi nege tórt aıaqty velosıped jasamadyń dep suraıdy? Onyń basqyshtary qıyn ári salmaqty aýyrlatady», - deıdi V.Ryjkın.