ShQO-daǵy «Uly dala altyny» kórmesi Kembrıdj mýzeıine qoıylmaq

ÓSKEMEN. QazAqparat – Shyǵys Qazaqstan oblysyndaǵy «Uly dala altyny» kórmesi bıyl Ulybrıtanııanyń Kembrıdj mýzeıine qoıylady, dep habarlaıdy QazAqparat tilshisi.

Bul jaıly oblys ákimdiginiń otyrysynda aımaq basshysy Danıal Ahmetov málimdedi.

«Óńir aýmaǵynda tabylǵan 26 myń jádiger túrli mýzeılerdiń ekspozıtsııalaryna sán bárip tur. «Uly dala altyny» kórmesi bıyl Ulybrıtanııanyń Kembrıdj mýzeıine qoıylady. Qazirgi ýaqytta Shyǵys Qazaqstandaǵy arheologııalyq zertteýlerdi eki jetekshi ǵalym Zeınolla Samashev pen Ábdesh Tóleýbaev jalǵastyrýda», - dedi ol.

Ótken jyly Tarbaǵataı aýdanyndaǵy Eleke sazynan 800-den astam altyn zerger buıymy, onyń ishinde Saq bıleýshisine tıesili at-ábzelderi tabylǵan bolatyn. Bul bizdiń zamanymyzǵa deıingi V-IV ǵasyrlardyń enshisindegi jádigerler.

«Ǵalymdar qazir qazaq memlekettiliginiń alǵashqy kezeńi týraly trılogııa daıyndap jatyr. Osy kezeńge qatysty barlyq málimetterdi zerdeleý úshin olar álemniń jetekshi kitaphanalaryna barady», - dedi Danıal Ahmetov.