ShQO-daǵy mektep oqýshylarynyń ýlanýy: 36 bala aýrýhanaǵa jatqyzyldy
Bul jaıly aımaq basshysy Danıal Ahmetov óziniń Facebook jelisindegi jeke paraqshasynda jazdy.
«Bozanbaı orta mektebi oqýshylarynyń densaýlyq jaǵdaılaryna baılanysty jappaı shaǵym tústi. Balalardyń dene qyzýy kóterilip, júrekteri aınyp, qusyp, ishteri ótken. Qazirgi tańda barlyǵy 82 bala dárigerlerdiń kómegine júgindi. Olardyń 36-sy Óskemen qalasyndaǵy Ana men bala ortalyǵyna jatqyzyldy. Balalar dárigerlerdiń baqylaýynda, jaǵdaılary qalypty. Aldyn ala qoıylǵan dıagnoz – jedel ishek ınfektsııasy», - dedi ol.
Oblys ákiminiń aıtýynsha, kesheli beri Bozanbaıda arnaıy komıssııa jumys isteýde. Onyń quramynda oblystyń bas pedıatry, epıdemıolog, ınfektsıonıst, sanıtarlyq-epıdemıologııalyq baqylaý qyzmetiniń mamandary jáne aýdan ákimi bar.
«Búgin aýylǵa qaraı Bilim men Densaýlyq saqtaý basqarmalarynyń, Sanıtarlyq-epıdemıologııalyq baqylaý departamentiniń basshylary jáne oblys ákimi apparaty basshysynyń orynbasary jolǵa shyqty. Mekteptegi tamaqtandyrýdy ashanany jalǵa alǵan jeke kásipker uıymdastyrǵan. Qazirgi ýaqytta atalǵan fakti boıynsha QR QK-niń 304-baby 1-bóligine sáıkes qylmystyq is qozǵaldy. Árıne, bul ýákiletti organdardyń tamaqtandyrý jumysyn júıeli baqylaýǵa almaǵandyǵynyń saldary. Sondyqtan, jaýapty tulǵalar jazaǵa tartylady», - dedi Danıal Ahmetov.
Sondaı-aq barlyq mektep, mektepke deıingi jáne arnaýly áleýmettik qyzmet kórsetetin mekemelerge tekserý uıymdastyrylmaq. Ata-analarǵa turaqty túrde jedel jáne naqty aqparat berý qajettigi eskertildi.
«Sonymen qatar Ana men bala ortalyǵynda emdelip jatqan balalar da ata-analarymen telefon arqyly baılanysqa shyǵyp otyrýlary qajet. Kesheden beri mektep karantınge jabylǵan. Oqýshylar qashyqtan oqý formatyna kóshirildi», - dedi óńir basshysy.
Esterińizge sala ketsek, osyǵan deıin ShQO-daǵy mektep oqýshylarynyń tamaqtan ýlanǵandyǵy habarlanǵan bolatyn.