ShQO-daǵy kolledj sheteldik geologııalyq barlaý kompanııalarymen yntymaqtastyq ornatty

NUR-SULTAN. QazAqparat - Shyǵys Qazaqstan oblysynyń Geologııalyq barlaý kolledjiniń júzdegen stýdenti men túlegi tek Qazaqstanda ǵana emes, Batys Eýropa, Soltústik Amerıka, Ońtústik-Shyǵys Azııa, TMD, tipti Afrıka elderinde jumys istep, óndiristik tájirıbeden ótip jatyr.

Bul oqý ornynyń qazaqstandyq, sondaı-aq sheteldik geologııalyq barlaý kompanııalarymen áriptestik ornatýynyń arqasynda júzege asyp otyr. Geologııalyq barlaý kolledjiniń túlekteri jumysqa ornalastyrý deńgeıi 96%-dy quraıdy, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.

Kolledjde kásiptik baǵdar berý, jumysqa ornalastyrý jáne monıtorıng bólimi jumys isteıdi. TjKB uıymdarynyń jumys berýshilermen qol jetkizgen kelisimderiniń arqasynda túlekter jumysqa ornalastyryldy, al kolledj stýdentteri elimizde jáne shetelde aqyly praktıkadan ótedi. Jyl saıyn kolledjge Qazaqstannyń barlyq óńirinen eki júzden astam talapker túsedi.

«Kolledj óz stýdentteriniń tájirıbeden ótip, odan ári sol jerde jumys isteýi úshin iri kompanııalarmen baılanys ornatady. Búgingi tańda 250-den astam geologııalyq kásiporyn bizdiń turaqty seriktesterimiz jáne uıymdar arasynda praktıkanttar men mamandarǵa degen suranys óte joǵary. Tájirıbeden ótýshilerdiń 90%-y jalaqy alady. Shetel qyzmetkerlerin qazaqstandyq mamandarmen kezeń-kezeńmen aýystyrýdy kózdeıtin Kadrlardy ulttandyrý baǵdarlamasyna sáıkes, kolledj QR aýmaǵynda jumys isteıtin halyqaralyq kompanııalarmen yntymaqtasady»,- dedi ShQO Geologııalyq barlaý kolledjiniń dırektory Ardaq Ádiljanov.

Kolledj seriktesteriniń qatarynda «Qazatomónerkásip» UAK» AQ, «Qazaqmys», «KazMinerals», «Aurora Minerals Group», «Rio Tinto», «Schlumberger», «Kaztsınk» jáne basqa da kásiporyndar bar.

Aıta keteıik, jumysqa ornalasqannan keıin de kolledj túlektermen baılanysta bolady. Bul kásiporyn jabylǵan nemese kadrlar qysqarǵan jaǵdaıda kolledj stýdentterin odan ári jumysqa ornalastyrý úshin qajet.

Sonymen qatar joǵary oqý oryndarymen seriktestiktiń arqasynda búgingi kúni kolledj túlekteriniń 80%-y Qazaqstan men Reseıdiń joǵary oqý oryndarynda qashyqtan bilim alyp jatyr.

«90 jyldyq tarıhynda kolledj 18 myń bilikti orta býyn geolog mamandaryn daıyndap shyǵardy. Kóptegen túlek iri kompanııalardyń basshylary, sondaı-aq qoǵam qaıratkerleri atandy. Kolledjdiń tanymal túlekteriniń qatarynda QR Ekologııa, geologııa jáne tabıǵı resýrstar mınıstrligi komıtetiniń tóraǵasy Talǵat Satıev, Aryqtaı Kaıýpov, German Jılınskıı jáne basqa da akademıkter bar»,-delingen habarlamada.