ShQO-daǵy Katonqaraǵaı aýdanynda medıtsına qyzmetkerlerine arnalǵan úıler salyndy
Katonqaraǵaı aýdanynda turǵyn úı qurylysy qarqyndy júrýde. Bul týraly aýdan ákimi Dildar Qalıqan «Memleket basshysynyń tapsyrmalary sheńberinde Katonqaraǵaı aýdanynyń áleýmettik-ekonomıkalyq damýy» taqyrybynda ótken baspasóz konferentsııasynda aıtty.
«Oblys ákimi Danıal Ahmetovtyń medıtsına qyzmetkerlerin pátermen qamtamasyz etýge qatysty tapsyrmasyn iske asyrý maqsatynda 6 páterli ekiqabatty 3 úıdiń qurylysy aıaqtaldy. Úıler Katonqaraǵaı aýdandyq ortalyq aýrýhananyń balansyna berildi. Sondaı-aq birqatar aýylda kópbalaly jáne az qamtylǵan otbasylarǵa arnalǵan úılerdiń qurylysy bastaldy. Atap aıtqanda, Shyńǵystaı aýylynda – 2, Aqqaınar, Belqaraǵaı, Órel aýyldarynda – 1 úıden», - deıdi ol.
Dildar Qalıqannyń aıtýynsha, byltyr aýdan ortalyǵy Úlken Naryn aýylynda 30 páterli úshqabatty turǵyn úı boı kótergen. Sonymen qatar «Birqabatty Shyǵys» baǵdarlamasy sheńberinde 20 jeke turǵyn úı salynǵan bolatyn. Barlyq baspana tıisti sanattaǵylarǵa kezek boıynsha berilgen.