ShQO-daǵy aýyldardyń jartysynan astamynda mobıldi ınternet joq – Baǵdat Mýsın

ÓSKEMEN. QazAqparat – Shyǵys Qazaqstan oblysyndaǵy aýyldardyń jartysynan astamynda mobıldi ınternet joq. Bul týraly Óskemende óńir turǵyndarymen kezdesken QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy QazAqparat tilshisi.

Mınıstr Shyǵys Qazaqstan oblysyna jumys sapary aıasynda Óskemendegi D.Serikbaev atyndaǵy ShQTÝ qabyrǵasynda aımaq halqymen kezdesý ótkizdi. Óz sózinde ol búginde memlekettik qyzmetterdiń 80 paıyzy eGov mobıldi qosymshasynda qoljetimdi ekenin jetkizdi.

«Aı saıyn 2,5 mln adam eGov mobıldi qosymshasyn paıdalanady. Kún saıyn qosymshaǵa 200 myń qoldanýshy kiredi. Kórsetkish kún sanap ósip keledi. Máselen eGov arqyly bir jyldyń ishinde 43 mln, al eGov mobıldi qosymshasyn 18 mln adam paıdalanǵan», - dedi Baǵdat Mýsın.

Onyń aıtýynsha, ShQO-daǵy 363 eldi mekenniń 197-sinde mobıldi ınternet joq.

«Oblys ákimi Danıal Ahmetovtyń usynysymen arnaıy jol kartasyn qurdyq. Onda eldi mekenderge tıisti antenalar ornatyp, mobıldi ınternet máselesin 2025 jylǵa deıin sheshpekpiz», - dedi mınıstr.