ShQO-daǵy 482 aýylda ınternet jyldamdyǵy baıaý
Aımaq basshysy Danıal Ahmetov tsıfrlandyrý jáne IT-tehnologııalardy damytý máselesi boıynsha jınalys ótkizdi. Birinshi kezekte eldi mekenderdi keń jolaqty ınternetpen qamtamasyz etý jaıy sóz etildi.
«Osy baǵyt boıynsha qoldanystaǵy respýblıkalyq jol kartasynan basqa, 2022 jyldyń qańtarynda ózimizdiń arnaıy baǵdarlamamyzdy ázirledik. Búgingi tańda 683 aýyl ınternetke qosylǵan. Alaıda onyń ishinde jyldamdyǵy sekýndyna 8 mbıtten joǵary 201-i ǵana. Ózge eldi mekenderde ǵalamtor jyldamdyǵy 5 mbıtten aspaıdy», - dedi oblys ákimi.
Onyń aıtýynsha, qalalar men aýdandardyń ákimderi árbir eldi mekenniń ataýy jáne ınternettiń shekti jyldamdyǵy kórsetilgen karta jasaýy tıis.
«250+» baǵdarlamasy aıasynda uıaly operatorlar aýyldardy mobıldi ınternetpen qamtamasyz etýge daıyn. Bizden 58 antenna-dińgek qurylysyn ornatý talap etiledi. Jergilikti atqarýshy organdarǵa 10 kún ishinde jobalyq-smetalyq qujattama ázirleýdi tapsyrdym», - dedi Danıal Ahmetov.
Aıta keteıik, óńir boıynsha 103 eldi mekende ınternet múlde tartylmaǵan.