ShQO-daǵy Zaısan aýdanynda kópbalaly otbasylar baspanaly boldy
Zaısan aýdanyna qarasty Saryterek aýylynda «Birqabatty Shyǵys» baǵdarlamasy aıasynda 2 kópbalaly otbasyǵa jańa baspananyń kiltteri tabys etildi. Turǵyn úılerde barlyq jaǵdaı jasalǵan. 4 bólmeli úıdiń kólemi – 91 sharshy metr. Óz úılerine kirgen ata-analar men balaqaılar máz-meıram.
Saltanatty sharaǵa qatysýshylardy aýdan ákiminiń orynbasary Rıshat Ramazanov, aýdandyq máslıhattyń tóraǵasy Erkebulan Zaǵyparov, Saryterek aýyldyq okrýgi boıynsha qoǵamdastyq múshesi Baýyrjan Toqtasynov jáne aýyldyq áıelder keńesiniń tóraǵasy Amanjol Orýmbaeva quttyqtap, aqjarma tilekterin aıtty.
«Aýyl aqsaqaly Bazylhan Janabaev aq batasyn berip, ájeler shashý shashty. Sodan soń jańa baspanalardyń lentasy qıyldy. Úılerdiń qurylysyn sapaly júrgizip, jumysty abyroımen aıaqtaǵan aýyl turǵyny Dáýletbek Sátbaevqa aýdan ákiminiń atynan Alǵys hat tapsyryldy. Shara sońy aýyl ónerpazdary daıyndaǵan merekelik kontsertpen jalǵasty», - dep habarlady aýdan ákimdiginen.
Byltyr Zaısan aýdanynda 40 kópbalaly januıa baspanaly bolǵan. Búginde aýdan boıynsha 265 kópbalaly otbasy turǵyn úı kezeginde tur.
«Jyl basynan beri baspana kezeginde turǵan 44 otbasyǵa úı kiltteri berildi. Zaısan qalasynan 4 úı, qalǵandary Qarabulaq, Qaratal, Daıyr, Birjan, Saryterek, Keńsaı, Aınabulaq aýyldarynan. 2024 jyldyń sońyna deıin taǵy birshama turǵyn úı salynyp, kezekte turǵandarǵa beriledi», - dep málim etti aýdandyq turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminen.