ShQO-daǵy «Qyzyl Tý» parom ótkeli óz jumysyn tolyqqandy toqtatty

<p>ÓSKEMEN. KAZINFORM &ndash; Shyǵys Qazaqstan oblysyndaǵy Buqtyrma sý qoımasyndaǵy &laquo;Qyzyl Tý&raquo; parom ótkeli óz jumysyn tolyqqandy toqtatty</p>

21 qazan kúni Memleket basshysynyń tapsyrmasy boıynsha Shyǵys Qazaqstan oblysyndaǵy Samar men Kúrshim aýdandaryn jalǵaıtyn Buqtyrma sý qoımasy arqyly ótetin kópir ashyldy. Bul elimizdegi eń uzyn kópir. Uzyndyǵy - 1316 metr. Eki jolaqty kópir táýligine 80 myńǵa deıin kólik ótkize alady.
Buryn osy arada «Qyzyl Tý» parom ótkeli jumys isteıtin. Ondaǵy birneshe parom halyqty arly-berli tasıtyn. Alaıda kópir ashylǵannan keıin paromdar qajettiligin joǵaltty.
ShQO ákimdiginiń málimetinshke, qazir parom óz jumysyn tolyqqandy toqtatty. Al 60 jyldan beri qoldanysta bolǵan eki parom kúrdeli jóndeýdi qajet etedi. Paromdar jóndeýden ótken soń qaıda jiberiletini ázirge belgisiz.
«Vasılev jáne Oktıabr ótkelderiniń jumysyn jandandyrý týraly Altaı, Samar, Úlken Naryn aýdandarynyń turǵyndary suraǵan edi. Ázirge naqty sheshim qabyldanǵan joq», - dep habarlady ShQO Jolaýshylar kóligi jáne avtomobıl joldary basqarmasynan.
Eske salsaq, osyǵan deıin Buqtyrmadaǵy kópirge 100-den astam kamera qoıylǵany habarlanǵan.