ShQO-daǵy qala, aýdan ákimderiniń jalaqysy qansha
Árbir qala, aýdan ákimine resmı saýalhat joldadyq. Keıbir ákimder birden jaýap berse, keıbiri «Aı saıynǵy jalaqymyz zańǵa sáıkes» nemese «Jalaqy aı saıyn túsedi» degen sııaqty qısynǵa kelmeıtin jaýaptar berdi. Olarǵa bul jaýaptarynyń BAQ zańyna qaıshy ekendigin túsindirip, qaıta hat joldaǵanymyzda óz eńbekaqylaryn naqty aıtýyna týra keldi.
Altaı aýdanynyń ákimi Renat Qurmambaevtyń jalaqysy – 990 916 teńge. Bul somadan zeınetaqy, salyq jáne mindetti áleýmettik medıtsınalyq saqtandyrý qoryna tólemder ustalady. Demek, ákimniń bul aılyqtan qolǵa alatyny 22 paıyzǵa az. Ýnıversıtetti 2001 jyly «Injener-pedagog» mamandyǵy boıynsha bitirgen Renat Qurmambaev memlekettik qyzmettegi eńbek ótilin 2003 jyldyń aqpanynda Katonqaraǵaı aýdany ákimdiginde bastaǵan.
Glýbokoe aýdanynyń ákimi Eldar Týmashınovtyń jalaqysy – 869 870 teńge. 2011 jyly QazUPÝ-dy ekonomıka mamandyǵy boıynsha bitirgen ákim «Kazenergy» jumys ótilin Astana qalasyndaǵy «Qazaqstandyq munaıgaz jáne energetıkalyq uıymdardy assotsııatsııasy» halyqaralyq karym-qatynas boıynsha departamentiniń ekspert-sarapshysy retinde bastaǵan.
Zaısan aýdanyn basqaryp otyrǵan Shyǵys Qazaqstan oblysyndaǵy jalǵyz ákim áıel Aelıta Ahmetsálimkyzynyń eńbekaqysy – 990 996 teńge. Ol 1989 jyly Óskemen pedagogıkalyq ınstıtýtyn «Dene shynyqtyrý» mamandyǵy boıynsha aıaqtaǵan.
1989 jyldan 2021 jylǵa deıin memlekettik kompanııalarda jáne kommertsııalyq qurylymdarda maman bolǵan. 2021 jyldan Shyǵys Qazaqstan oblysynyń oblystyq máslıhatynyń VII, VIII shaqyrylymdarynyń depýtaty. Al ákimdiktegi qyzmetin birden ákim laýazymynan bastaǵan. Zaısan aýdanyn 2023 jylǵy 14 maýsymnan beri basqaryp keledi.
Katonqaraǵaı aýdany ákiminiń mindetin atqarýshy Rasýl Karabalınovtyń jalaqysy – 862 652 teńge. Osydan eki apta buryn ǵana aýdanǵa ákim bolyp Danııar Dúısenbaev taǵaıyndalǵan. Alaıda ol áli aılyǵyn qolǵa alyp úlgergen joq.
Kúrshim aýdanynyń ákimi Almat Aqyshovtyń eńbekaqysy – 941 myń teńge. 2011 jyly L.N. Gýmılev atyndaǵy Eýrazııalyq Ulttyq ýnıversıtetin «Týrızm» mamandyǵy boıynsha bitirgen ákimniń memlekettik qyzmettegi jalpy eńbek ótili 11 jyldan asady.
Óskemen qalasynyń ákimi Jaqsylyq Omardyń jalaqysy – 926 102 teńge. Qalany basqaryp kele jatqanyna 6 jyldan asqan ol 2001 jyly Abaı atyndaǵy Almaty memlekettik ýnıversıtetin «Geografııa» mamandyǵy boıynsha bitirgen.
Rıdder qalasynyń ákimi Dýman Rahmetqalıevtiń qolǵa alatyn jalaqysy – 745 864 myń teńge. 2011 jyly Halyqaralyq Praga ýnıversıtetin «Halyqaralyq saýda» mamandyǵy boıynsha bitirgen ol jumys ótilin 2011 jyly «Teploenergosnab» JShS-da ekonomıst bolyp bastady.
Samar aýdany ákiminiń mindetin atqarýshy Jasulan Maıkenev budan áldeqaıda az aılyq alady. Naqty aıtqanda, qolǵa – 526 myń teńge. Shyǵys Qazaqstan memlekettik ýnıversıtetinde «quqyqtaný» mamandyǵy boıynsha bilim alǵan sheneýnik memlekettik qyzmette 2008 jyldan beri jumys istep keledi. Biraq osy ýaqytqa deıin birde-bir ret birinshi basshy bolyp kórgen emes.
Tarbaǵataı aýdanynyń ákimi Darhan Jórgekbaevtyń eńbekaqysy qolǵa – 786 848 teńge. Osy aýdannyń Aqjar aýylynda dúnıege kelgen ol eńbek ótilin Shyǵys Qazaqstan oblystyq Aqparattyq-statıstıkalyq ortalyǵy baǵa statıstıkasy bóliminiń mamany-baǵa tirkeýshisi bolyp bastaǵan.
Ulan aýdanynyń ákimi Arman Bekbosynovtyń jalaqysy zeınetaqy, salyq jáne mindetti áleýmettik medıtsınalyq saqtandyrý qoryna tólemderdi ustamaǵanda – 990 916 teńge. 1995 jyly Óskemen qurylys-jol ınstıtýtynyń dıplomyn alǵan ákim eńbek jolyn «ShQO Avtomobıl joldary» qazynalyq kásipornynyń 1 sanatty ınjeneri retinde bastady.
Shemonaıha aýdanyn basqaryp otyrǵan Grıgorıı Akýlovtyń jalaqysy – 990 916 teńge. 1991 jyly Semeı zootehnıkalyq-mal dárigerlik ınstıtýtyn «Mal dárigeri» mamandyǵy boıynsha bitirgen. Oqýdan soń Shemonaıha aýdanynda «Belokamenskıı» sovhozynda aǵa, sodan keıin bas mal dáriger bolyp jumys istedi. Qazirgi qyzmetke 2019 jyldyń qańtarynda taǵaıyndalǵan.