ShQO-daǵy dándi jáne maıly daqyldardyń ónimdiligi 25 paıyzǵa artty

<p>ÓSKEMEN. KAZINFORM &ndash; Shyǵys Qazaqstan oblysynda bıyl dándi jáne maıly daqyldardyń ónimdiligi 25 paıyzǵa artyp otyr.</p>

Bul týraly búgin QR Prezıdenti janyndaǵy Ortalyq kommýnıkatsııalar qyzmetiniń kóshpeli baspasóz konferentsııasynda Shyǵys Qazaqstan oblysynyń ákimi Ermek Kósherbaev málim etti.

Foto: Shyǵys Qazaqstan oblysy ákimdigi

— Aýyl sharýashylyǵy — Shyǵys Qazaqstan ekonomıkasynyń kúretamyry. Bul salany damytý — basty mindetterdiń biri.

Bıyl dándi jáne maıly daqyldardyń ónimdiligi 25 paıyzǵa ósip, eksport ulǵaıdy. Óńdelgen ónimderdiń eksporty bir jylda 37,6-den 65,5 paıyzǵa deıin ósti. Kúnbaǵys maıyn óndirýden Shyǵys Qazaqstan elimizde 1 orynda tur. Naqty aıtqanda, jylyna 255 myń tonna.  Keleshekte oblystyń eksporttyq potentsıalyn kóterý úshin osy jyly halyqaralyq sharalar sheńberinde eksportqa ósimdik maıyn tasymaldaýǵa birneshe iri kelisim-shart jasastyq, — deıdi ol.

Oblys ákiminiń aıtýynsha, QHR halyqaralyq kórmesinde 11 mln dollardyń kelisim-shartyna qol qoıylǵan. Al Samarqandta ótken 4-shi «Qazaqstan-Ózbekstan» halyqaralyq yntymaqtastyq forýmynda 12 mln dollarǵa kelisim-shart jasaldy.

— Ulan men Zaısan aýdandarynda sýdy únemdeıtin agrotehnologııalar boıynsha iri jobalar júzege asyrylyp jatyr. «Ertis» áleýmettik kásipkerlik korporatsııasynyń» qatysýymen «ERTIS BEREKE OSKEMEN» kompanııasy birlesken kásiporyn quryp, «Su Bereke» brendimen otandyq tamshylatyp sýarý qondyrǵysyn óndirýge kiristi. Jobaǵa jergilikti bıýdjetten 1,6 mlrd teńge bólindi. Sondaı-aq Óskemende jylyna 50 myń tonna shıkizat óndiretin «Altaı maı» maı ekstraktsııalaý zaýytynyń qurylysy aıaqtalady. Bul zaýyt óńdelgen ónimniń kólemin 595 myń tonnadan 700 myń tonnaǵa deıin ósirýge múmkindik beredi. Ósimdik maıynyń eksporty bir jarym esege ulǵaıady, — deıdi Ermek Kósherbaev.