ShQO-daǵy aýrýhana memlekettik satyp alý portalynda ádeıi qatelik jiberip kelgen – Antıkor

<p>ÓSKEMEN. KAZINFORM &ndash; Shyǵys Qazaqstan oblysy Altaı aýdanyndaǵy aýrýhana qyzmetkerleri memlekettik satyp alý portalynda ádeıi qatelik jiberip kelgen bolýy múmkin. Bul týraly Antıkordan málim etti.</p>

QR Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, memlekettik satyp alý portalyna monıtorıng júrgizý barysynda Altaı aýdany aýrýhanasy qyzmetkerleriniń áreketi kúdik týdyrǵan.

«Aýrýhana memlekettik satyp alý portalynda 1700-den astam habarlandyrý jarııalaǵanymen, olardyń keıbiri jaramsyz dep tanylǵan. Osylaısha, jergilikti kompanııalardyń tenderlerdi utyp alýyna múmkindik jasaldy», - delingen aqparatta.

Máselen, 67 kelisim-sharttaǵy orys tilindegi jazbalarda qazaq tiliniń áripteri qoldanylǵan. Osyndaı qateler basqa kompanııalarǵa tender habarlandyrýyn tabýdy qıyndatyp, bul satyp alý protsesi ótpedi dep jarııalanýyna jol ashty. Sonyń arqasynda aýrýhana bir kózden kelisim-shart jasasyp otyrǵan.

«Osyndaı habarlandyrýlardan keıin aýrýhana jergilikti kompanııamen 86 mln teńgeden astam somaǵa kelisim-shart jasasty. Osyndaı áreketterge zań boıynsha jol berilmeıdi. Sebebi bul bıýdjet qarajatyn tıimsiz paıdalanýǵa ákelip soǵady. Buǵan jol bergen aýrýhana qyzmetkerleri jaýapqa tartyldy», - deıdi departament basshysy Denıs Shakenov.

Eske salsaq, osyǵan deıin ShQO-da 780 áıel dekrettik tólemdi arttyrý úshin jeke kásipker retinde tirkelgeni habarlanǵan.