ShQO-daǵy aýyl mektebinde sottalǵan adamdardyń jumys istegeni anyqtaldy

<p>ÓSKEMEN. KAZINFORM &ndash; Shyǵys Qazaqstan oblysy Samar aýdanyndaǵy mektepte sottalǵan birneshe adam jumys istegen.</p>

Samar aýdanynyń prokýratýrasy mektepte Eńbek kodeksi buzylǵandyǵyn anyqtady. Buryn sotty bolǵan adamdar zańsyz jumysqa alynǵan.

«Atap aıtqanda, buryn qasaqana qylmys jasaǵany úshin sottalǵan muǵalim men 2 kúzetshi bilim ordasynda jumys istedi. Bul Eńbek kodeksiniń 26-baby 2-tarmaǵy 3-tarmaqshasynyń talaptaryna qaıshy», - dep habarlady ShQO Prokýratýrasynan.

Sondaı-aq psıhıatrııalyq buzylýlarǵa baılanysty «D» esebinde turǵan 1 adam kómekshi personal bolyp eńbek etken.

«Prokýratýra sharalary boıynsha bilim berý uıymynda jumys isteýine jol berilmeıtin adamdarmen eńbek sharttary buzyldy. Kináli laýazymdy tulǵalar tártiptik jaýapkershilikke tartyldy», - delingen aqparatta.

Mektep dırektoryna 25 AEK (92 300 teńge) mólsherinde aıyppul salynǵan.