ShQO-daǵy apattar medıtsınasy: dárigerler 281 oqys oqıǵaǵa baryp, shuǵyl kómek kórsetken

<p>ÓSKEMEN. KAZINFORM &ndash; Shyǵys Qazaqstan oblysyndaǵy apattar medıtsınasy ortalyǵynda 13 dáriger jumys isteıdi. Jyl basynan beri olar 281 oqys oqıǵaǵa bardy. Sonyń nátıjesinde 70-ten astam azamatqa kómek kórsetip, 27 adamdy evakýatsııalaǵan.&nbsp;</p>

Apattar medıtsınasy ortalyǵynyń qyzmetkerleri shalǵaıda jatqan jáne jetý qıyn eldi mekenderge, medıtsınalyq mekemelerden jyraqta ornalasqan aýyldarǵa baryp jumys isteıdi. Máselen, osydan birneshe jyl buryn sý tasqyny kezinde Altaı aýdanynyń turǵyndaryna shuǵyl túrde medıtsınalyq kómek kórsetken.

Ortalyq dárigerleri janýarlarǵa da kómekke keledi. Ótken jyly Óskemendegi turǵyn úıde órt shyqqan kezde órt sóndirýshiler ýlanǵan eki bengal mysyǵyn syrtqa alyp shyqty. Apattar medıtsınasy ortalyǵynyń qyzmetkerleri jasandy tynys alý apparatyn jáne tıisti reanımatsııalyq sharalardy qoldanyp, janýarlardy aman alyp qalǵan.

«Kóbinesi jol-kólik oqıǵalaryna shaqyrtý túsip jatady. Túrli jaraqat alǵan jolaýshylar bolady. Oqıǵa ornyna kelip, zardap shekkenderdi tekserip, olarǵa alǵashqy medıtsınalyq kómek kórsetemiz. Sodan keıin aýyr jaraqattanǵan azamattardy jaqyn jerdegi medıtsınalyq mekemege jetkizemiz. Biz eldi mekenderdegi turǵyndarǵa táýlik boıy kómektesýge ázirmiz. Kóbinese úı sharýasynda júrip jaraqat alǵandar, qan qysymy joǵarylap ketkender habarlasady. Tipti áıeldi bosandyryp alǵan kezderimiz de bolǵan. Úsh jyl buryn avtobýs tolǵan jolaýshylar qar qursaýynda qalǵan edi. Sol jerge baryp, olardyń jylynyp alýlaryna jaǵdaı jasadyq», - deıdi ortalyqtyń jedel medıtsınalyq járdem bólimi basshysynyń orynbasary Gúlnar Musabalınova.