ShQO-daǵy Altaı aýdanynda aýlalardan sý sorylyp, jaǵdaı turaqtaldy
06:12, 04 Mamyr 2024
<p>ÓSKEMEN. KAZINFORM – Shyǵys Qazaqstan oblysy Altaı aýdanynda aýlalardan sý sorylyp, jaǵdaı turaqtaldy. </p>
Keshe Altaı aýdanynda Buqtyrma ózeniniń sý deńgeıi kóterilip, jer úıler mańyndaǵy aýmaqqa sý jaıylǵan bolatyn. Abyroı bolǵanda, úılerge sý kirgen joq.
Oqıǵa ornyna qutqarýshylar men jergilikti atqarýshy organ qyzmetkerleri shuǵyl kelip jetken. Barlyǵy 20-dan astam aýladaǵy sý soryldy.
«Táýlik boıy júrgizilgen jumystardyń arqasynda turǵyn úı aýmaqtarynan qyzyl sý buryldy. Barlyǵy 370 ydys-qap tóselip, 1335 tonna ınertti materıal tógildi. Motopompalarmen 27800 tekshe metr sý soryldy. Jaǵdaı turaqtaldy», - dep habarlady ShQO tótenshe jaǵdaılar departamentiniń baspasóz qyzmetinen.
Eske salsaq, osyǵan deıin Altaı aýdanynda úılerdi sý basqany jaıly jalǵan aqparat taraǵany habarlanǵan.