ShQO-daǵy 13 aýdanda sý tasqynynyń aldyn alý sharalary júrgizilip jatyr
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha sý tasqyny kezeńine daıyndyq sheńberinde birqatar shara qolǵa alynǵan.
Oblystyń 13 aýdanynda sý tasqynyna qarsy 55 is-sharany iske asyrý josparlanyp otyr. Búgingi tańda onyń 7-si oryndaldy, 2-ýi Altaı aýdanynda, 2-ýi Zaısan aýdanynda, 2-ýi Katonqaraǵaı aýdanynda jáne 1-ýi Rıdder qalasynda.
«Zaısan aýdanynda Shalqar aýylynda 1200 metrlik qorǵaý bógeti qalpyna keltirildi, Qarabulaq aýyldyq okrýginiń Sátbaı aýylynda sý tasqynyna qarsy bóget jóndeldi. Katonqaraǵaı aýdanyndaǵy Berel aýylynda Buqtyrma ózeniniń túbin tereńdetý, arnasyn tazartý jáne Korobıha aýylyndaǵy Buqtyrma ózeninde uzyndyǵy 400 metr jaǵalaýdy nyǵaıtý boıynsha jumystar aıaqtaldy», - delingen aqparatta.
Altaı aýdany Soloveva aýyldyq okrýgi Maıak aýylynyń Ortalyq kóshesindegi uzyndyǵy 800 metr sý burǵysh aryq tazartylyp, uzyndyǵy 5000 metr Vtorýshka jáne Maslıanskaıa ózenderiniń arnasy tereńdetilgen.
Sondaı-aq, Altaı aýdanynyń Bogatyrevo aýylynda uzyndyǵy 100 metr bóget jóndelip jatyr. Berezovka ózeniniń arnasy tazartyldy jáne Solovevo aýylyndaǵy uzyndyǵy 1000 metr bóget salý jumystary júrgizilýde.