ShQO-da jyl saıyn taýda 10-ǵa jýyq adam adasady

ÓSKEMEN. QazAqparat – Shyǵys Qazaqstan oblysynyń qutqarýshylary taýly jerlerde adasyp ketken jaǵdaıda ne isteý kerektigin túsindirdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, jyl saıyn taýda 10-ǵa jýyq adam adasyp ketedi. Qanshalyqty tájirıbeli saıahatshy bolsańyz da jol tappaı qalýyńyz ábden múmkin.

«Eger adam taýda bir ret júrip ótken marshrýt boıynsha bet alsa adasyp ketýi ábden yqtımal. Baǵdardy joǵaltý qaýpi ásirese keshki ýaqytta, ymyrt úıirilgen kezde arta túsedi. Jalǵyz júrse de, bir top adam bolsa da adasýy múmkin», - deıdi jedel-qutqarý jasaǵynyń qyzmetkerleri.

Osy rette, qutqarýshylar birinshi kezekte úreılenbeýge keńes beredi.

«Affekt jaǵdaıyndaǵy áreketter kútpegen saldarǵa ákelip soǵady. Abaısyzda taýdan qulap, jaraqat alýyńyz múmkin. Sabyr saqtap, «112» nómirine habarlasyp qajetti aqparatty berýge tyrysyńyz. Eger uıaly telefonyńyz bolmasa, óz kúshińizge senýińiz kerek. Ashyq jerge shyǵyp, qutqarýshylarǵa sıgnal berińiz. Qarańǵy túskende ot jaǵyp, al kúndiz ashyq tústi kıimdi bıik jerge ilip qoıyńyz», -deıdi oblystyq TJD JQJ bas qutqarýshysy Erik Bulǵynbaev.

Onyń aıtýynsha, saıahatshynyń mindeti – táýekelderdi barynsha azaıtý. Eń aldymen, jolǵa daıyndalyp, marshrýtty barynsha zertteý kerek. Fızıkalyq jattyǵý jasaǵan da jón. Naqty qozǵalys josparyn túsinip, «112» qyzmetine saıahatqa shyǵyp bara jatqanyńyzdy, mólshermen qashan qaıtatynyńyzdy habarlaǵan durys.

Kóshkin jáne sel qaýpi bar ýchaskelerdiń kartasymen tanysýdy umytpańyz. Búgingi aýa-raıy boljamyn qarap, soǵan sáıkes kıim men jabdyqty tańdaǵan abzal.