ShQO-da jyl saıyn 500-den astam kópbalaly otbasy baspanaly bolady

ÓSKEMEN. QazAqparat – Shyǵys Qazaqstan oblysynda jyl saıyn 500-den astam kópbalaly januıaǵa baspana berilmek, dep habarlaıdy QazAqparat.

Oblys ákimdiginde ótken jıyn barysynda ShQO qurylys, sáýlet jáne qala qurylysy basqarmasynyń basshysy Baýyrjan Qudııarov «Nurly jer», «Baqytty otbasy», «7-20-25» baǵdarlamalary boıynsha ıpotekalyq nesıelendirý júıesi qalaı júzege asyrylyp jatqanyn aıtyp berdi. Ótken jyly óńirde jalpy aýmaǵy 443 myń sharshy metrdi quraıtyn 40 kópqabatty turǵyn úı men 54 jeke turǵyn úı paıdalanýǵa berilgen.

«Bıyl oblys ákiminiń tapsyrmasyna sáıkes turǵyn úı qurylysy eki esege artady. Nátıjesinde óńirde jalpy aýmaǵy 550 myń sharshy metrdi quraıtyn 76 kópqabatty turǵyn úı salynady. Bul óz kezeginde turǵyn úı qurylysynyń qarqyndy damýyna múmkindik bermek», - deıdi basqarma basshysy.

Qazirde oblys boıynsha 1847 kópbalaly otbasy baspana kezeginde tur. Sońǵy bir jyldyń ishinde bul kórsetkish eki esege artqan.

«2020 jyly 329 az qamtylǵan kópbalaly otbasy qonys toıyn toılaıdy. Jospar boıynsha jyl saıyn 550-600 kópbalaly otbasy baspanamen qamtamasyz etilmek. Óńirde «Baqytty otbasy» baǵdarlamasy boıynsha turǵyn úı alýǵa 314 kópbalaly januıa ótinish bildirgen. Onyń ishinde 290-y maquldanǵan», - deıdi Baýyrjan Qudııarov.

Aıta keteıik, Shyǵys Qazaqstan respýblıka kóleminde «7-20-25» baǵdarlamasyn júzege asyrý boıynsha besinshi orynda tur.