ShQO-da jýrnalıstıka mýzeıi ashyldy
Mýzeıge qoıylǵan eksponattar óńirdegi jýrnalıstıka salasynyń barlyq damý kezeńderinen syr shertedi. Munda kelgen Óskemen qalasynyń turǵyndary men qonaqtary jýrnalıstıkanyń júzjyldyq tarıhyna úńilip, fotosýretter men materıaldar arqyly baspa men jazý ádisi qalaı damyǵanyn kóre alady.
Aımaqtyq basylymdar tarıhyn saqtaıtyn mýzeıdi qurý ıdeıasy 2005 jyly paıda bolǵan. Bul oıdyń avtorlary – belgili jýrnalıster Qabdylqaıyr Qudaıbergenov, Jumadil Ádilbaev jáne Aıtmuhambet Qasymov.
«Áýelde bul jumys bólmesindegi shaǵyn ǵana mýzeı buryshy sııaqty boldy. Onda jıyrmaǵa jýyq túrli eksponattar qoıylǵan edi. Áriptesterimiz ylǵı mýzeıdi tolyqtyryp otyrǵan. Ýaqyt ótken saıyn eksponattar sórelerge syımaı ketti. Sóıtip, mýzeı ashý jaıly oılaı bastadyq», - dedi oblystyq «Rýdnyı Altaı» gazetinde uzaq jyl jumys istegen Qabdylqaıyr Qudaıbergenov.
Eski fotoapparattar, jazý mashınkalary, taspaly magnıtofondar, fotosýretter men túrli marapattar – mýzeı qonaqtaryn jýrnalıstıka álemimen tanystyrady.
Aıta keteıik, mýzeı Óskemendegi Q.Qaısenov atyndaǵy saıabaqta ornalasqan.