ShQO-da JShS basshysy úleskerlerden zańsyz 606 mln teńge jınaǵan

Qarjy monıtorıngi agenttiginiń Shyǵys Qazaqstan oblysy boıynsha departamenti úleskerlerden zańsyz aqsha jınady degen kúdikpen JShS basshylyǵyna qatysty qylmystyq isti tergep jatyr, dep habarlaıdy QazAqparat.

Qylmystyq isti tergeý barysynda JShS-niń laýazymdy qyzmetkerleri 2021-2023 jyldar aralyǵynda úleskerlerdiń aqshalaı qarajat tartýǵa ruqsaty bolmasa da, páterlerdi erte kezeńde brondaý arqyly azamattardy úlestik qurylysqa belsendi tartqany anyqtaldy.
Olar halyqtyń senimin asyra paıdalanyp, olardy aldaý arqyly 606,5 mln teńge somasynda aqsha qarajatyn ıemdengen.
Qazirgi ýaqytta taraptardyń qosymsha kelisimder jasasýy arqyly páterlerdi aldyn ala brondaý sharttary toqtatyldy, qurylys jumystary júzege asyrylmaıdy. Sot sheshimimen JShS-niń qurylys-montaj jumystaryn oryndaýǵa lıtsenzııanyń qoldanylýy toqtatyldy.
JShS jetekshisine sottyń sanktsııasymen qamaýda ustaý túrindegi bultartpaý sharasy tańdaldy.
Tergeý jalǵasýda. QR QPK-niń 201-babyna sáıkes ózge aqparat jarııalanbaıdy.