ShQO-da joldardy kútip ustaý jumysynan 83 buzýshylyq anyqtaldy

ÓSKEMEN. QazAqparat – Shyǵys Qazaqstan oblysynda qys bastalǵaly beri joldardy kútip ustaý jumystaryna qatysty 83 kemshilik anyqtaldy, dep habarlaıdy QazAqparat tilshisi.

Jol aktıvteri ulttyq sapa ortalyǵy ShQOF baspasóz qyzmetiniń málimetinshe, mamandar óńir boıynsha joldardy kútip ustaý jumystarynyń sapasyn qadaǵalap otyr.

Qys bastalǵaly beri oblystaǵy respýblıkalyq mańyzy bar joldarǵa 77 ret tekserý júrgizilip, 83 buzýshylyq anyqtalǵan.

«Kóbinese bul jol boıynda qardyń ýaqtyly shyǵarylmaýy, kóktaıǵaq jáne jol jıekteriniń tazalanbaýyna qatysty bolyp otyr. Kóktaıǵaqqa qarsy materıaldar da tekserilip, onyń 11 synamasy bekitilgen standarttarǵa sáıkes kelmedi. Merdiger uıymdarǵa da, tapsyrys berýshilerge de tıisti eskertýler joldandy», - deıdi fılıal ınjeneri Erkin Daýmov.

Al qazirgi ýaqytta joldarda sý ótkizgish qubyrlardy tazalaý jumystary baqylaýǵa alynǵan.

Osy jumystar sapasyz júrgizilse jol tóseminiń shaıylyp, qozǵalystyń jabylýyna jáne jol jóndeýge qosymsha shyǵyndardyń jumsalýyna ákep soǵýy múmkin.

Jalpy oblys boıynsha 2148 sý ótkizgish qubyr men 114 kópir bar. Olardyń keıbiri áli durys tazalanbaǵan.