ShQO-da jol erejesin buzǵan 12 avtobýs júrgizýshisi jaýapqa tartyldy
Reıd barysynda Semeı qalasynyń tártip saqshylary shahardaǵy basty kóshelerdiń birinde avtokólikti mas kúıinde tizgindegen 37 jastaǵy er adamdy ustady. Tekseris kezinde onyń 2 jyl buryn Almaty oblysy Talǵar aýdandyq sotynyń sheshimimen kólik quralyn basqarý quqyǵynan aıyrylǵany anyqtalǵan. Qazirgi ýaqytta osy fakti boıynsha QR Qylmystyq kodeksiniń 346-baby 1-bóligimen sotqa deıingi tergep-tekserý júrgizilýde.
«Qaýipsiz jol» respýblıkalyq jedel aldyn alý sharasynyń birinshi kúninde óńir polıtseıleri kólikti mas kúıde basqarǵan 25 júrgizýshini, buryn kólik basqarý quqyǵynan aıyrylsa da rýlge otyrǵan 6 adamdy, manevr jasaý erejelerin buzǵany úshin 70 júrgizýshini jáne qaýipsizdik beldigin taqpaǵan 227 júrgizýshini anyqtady. Jol qozǵalysy erejelerin buzǵan 12 qoǵamdyq kólik júrgizýshisi jaýapqa tartylǵan. Sonymen qatar aıyp turaǵyna barlyǵy 22 avtokólik qoıyldy. Budan bólek, JQE buzǵany úshin 280-nen astam jaıaý júrginshi ákimshilik jaýapkershilikke tartyldy», - dedi ShQO Polıtsııa departamentiniń bastyǵy Saǵat Mádıev.
Sondaı-aq ShQO polıtsııa qyzmetkerleri jóndeý jumystary júrip jatqan apattyq joldar men ýchaskelerge qosymsha tekserý júrgizdi. Qozǵalys qaýipsizdigin qamtamasyz etý úshin 11 belgi qoıyldy.
Aıta keteıik, «Qaýipsiz jol» respýblıkalyq jedel aldyn alý sharasy 24 qyrkúıekke deıin jalǵasady.