Jylytý maýsymy bastalǵaly oblys boıynsha jer úılerde 58 órt tirkeldi. Bul týraly ShQO tótenshe jaǵdaılar departamentiniń baspasóz qyzmeti habarlap otyr.
Órtterdiń 40%-y ot jaǵý kezindegi salaqtyqtan, 27%-y pesh jaǵý kezinde órt qaýipsizdigi talaptaryn saqtamaýdan, 21%-y elektr jabdyqtary men quraldaryn ornatý jáne paıdalaný kezinde qaýipsizdik erejeleriniń buzylýynan bolǵan. Sonymen qatar balalardyń otpen oınaýy jáne tósekte shylym shegý saldarynan da órt shyqty.
- Jer úılerdi aralaý jáne reıdter júrgizý barysynda mamandar órt qaýipsizdigi talaptarynyń buzylýynyń 9000-nan astam faktisin anyqtady. Halyq bul kemshilikterdi der kezinde joıady degen úmitemiz. Aqaýy bar rozetkany ýaqtyly jóndep, ashyq otty qoldanǵanda barynsha saq bolǵan durys, - deıdi departamenttiń Memlekettik órt baqylaý basqarmasynyń bastyǵy Nurjan Ómirjanov.
Eske salsaq, osyǵan deıin Aqtóbede taǵy da qoqys polıgony órtengeni habarlanǵan.