ShQO-da jylytý maýsymy bastalǵaly úıdegi órt qaýipsizdigi erejelerin saqtamaǵan 9 adam kóz jumdy

<p>Shyǵys Qazaqstan oblysynda bıylǵy jylytý maýsymy bastalǵaly úıdegi órt qaýipsizdigi erejelerin saqtamaǵan 9 adam qaza boldy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

ShQO Tótenshe jaǵdaılar departamenti baspasóz qyzmetiniń málimetine súıensek, jylytý maýsymy bastalǵaly beri qutqarýshylar 121 000-ǵa jýyq úıdi aralap shyqty. Sonyń barysynda turǵyndarǵa pesh jaǵý men elektr qurylǵylaryn paıdalaný kezindegi órt qaýipsizdigi erejelerin túsindirdi.

Alaıda azamattardyń órt qaýipsizdigi talaptaryn buzatyndar áli de jıi kezdesedi. Saldarynan 121 ret órt shyǵyp, 9 adam kóz jumǵan. Qaıǵyly oqıǵanyń 8-i otty abaısyz qoldanýdan, 1-i elektr jabdyqtaryn paıdalaný kezinde órt qaýipsizdigi erejeleriniń saqtamaýynan boldy.

«Oblystaǵy turǵyn úı sektoryna reıdter júrgizý kezinde barlyǵy 22 987 buzýshylyq anyqtaldy. Olardyń ishinde jıi kezdesetini – ýaqtyly tazalanbaǵan tútin murjalary, peshter men elektr symdarynyń nashar jaǵdaıy, qoldan jasalǵan elektr aspaptaryn paıdalaný. Halyqtan óz qaýipsizdigi úshin osyndaı buzýshylyqtardy ýaqtyly joıýdy suraımyz. Jarqyldap turǵan rozetkany ýaqytynda jóndep, ashyq otty qoldanǵanda abaı bolǵan jón» - dep túsindirdi TJD Memlekettik órt baqylaý basqarmasynyń bastyǵy Nurjan Ómirjanov.