ShQO-da jaz kezinde jaǵalaýlarda 6 qutqarý beketi jumys isteıdi

ÓSKEMEN. QazAqparat – Shyǵys Qazaqstan oblysynda jaz kezinde jaǵalaýlarda 6 qutqarý beketi jumys isteıdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búginde Alakólde qutqarý beketi jumysyn bastady.

Alakóldegi bekette eki apta saıyn demalýshylardyń qaýipsizdigin qamtamasyz etý úshin 6 súńgýir men 4 órt sóndirýshi kezekshilik atqarady. Mundaǵy maqsat – sýdaǵy jazataıym oqıǵalardyń jáne kól jaǵasynda ornalasqan demalys bazalaryndaǵy órttiń aldyn alý.

«Jyl saıyn jazda departament qutqarýshylary kúsheıtilgen jumys rejımine aýysady. Olar qaıyqpen patrýldep, demalýshylar men nysan ıeleriniń órt qaýipsizdigi erejelerin saqtaýyn qadaǵalaıdy. Sondaı-aq azamattarǵa nusqaýlyqtar men jadynamalar taratylady. Jalpy oblys boıynsha jaz kezinde jaǵalaýlarda 6 qutqarý beketi jumys isteıdi», - dep habarlady vedomstvo ókilderi.

Aıta keteıik, Alakóldegi qutqarýshylar 2020 jyly 7 adamdy, onyń ishinde 4 balany qutqarǵan.