ShQO-da jaıylymdyq jer tapshylyǵy 700 myń gektardy quraıdy
Oblys ákimdiginde aýyl turǵyndaryn jaıylymdyq jermen qamtamasyz etý máselesi boıynsha jınalys ótti. Aımaq basshysy Danıal Ahmetovtyń aıtýynsha, qazir óńirdegi jaıylymdyq jer qajettiligi 700 myń gektardy qurap otyr.
«Búginde Óskemen, Semeı jáne Rıdder qalalarynda bul másele tolyǵymen sheshimin tapqan. Degenmen, birqatar aýdanda jaıylymdyq jer tapshylyǵy áli de sezilýde. Bul ShQO Aýyl sharýashylyǵy basqarmasynyń óz jumysyn tıisti deńgeıde atqarmaýy saldarynan týyndady», - dedi ol.
Danıal Ahmetovtyń sózinshe, paıdalanylmaı jatqan jerlerdi qaıtaryp alý jumysy alǵa qoıylǵan. Kásipkerlermen jerdi óz erkimen nemese sot arqyly qaıtarý týraly kelissózder júrgizý máselesi qarastyrylýda.
«Shyǵys Qazaqstan halqynyń 40 paıyzy aýylda turady. Olar mal sharýashylyǵymen aınalysqysy keledi. Bizde sút qabyldaý pýnkteri men aýylsharýashylyq ónimderin qabyldaıtyn bordaqylaý alańdary bar. Sondyqtan jaıylymdyq jer tapshylyǵyn joıý, paıdalanylmaı jatqan jer telimderin qaıtarý máselesi birinshi kezekte turǵany anyq», - dep qorytyndylady oblys ákimi.