ShQO-da jastardy jumyspen qamtý úshin qandaı sharalar atqarylýda
Jyl basynan beri óńirde NEET sanatyndaǵy jastardy áleýmettendirý boıynsha arnaıy joba júzege asyrylýda. NEET sanaty degenimiz - oqý oqymaıtyn, jumys istemeıtin jáne óz biliktiligin arttyrmaıtyn jastar.
«Jastar» ǵylymı-zertteý ortalyǵynyń málimeti boıynsha bul sanattaǵy jastardy 4 topqa jatqyzýǵa bolady. Atap aıtqanda, jumyssyzdar, úı sharýashylyǵyn júrgizýmen aınalysatyndar, jumys nemese oqý izdep júrmegen belsendiligi tómen jastar jáne jumys isteý múmkindigi bar múgedek adamdar. Bıyl qalalar men aýdandardaǵy jastar resýrstyq ortalyqtary NEET sanatyndaǵy jastardyń sapalyq-sandyq kórsetkishterin anyqtaý maqsatynda úılerdi aralap shyqty», - deıdi ShQO ishki saıasat basqarmasy jastarmen jumys bóliminiń basshysy Erkebulan Baltabekov.
Nátıjesinde jastardyń jeke derekterin, turǵylyqty jerin, bilimi men otbasy jaǵdaıyn kórsete otyryp, áleýmettik kartalar jasaldy. Úılerdi aralaý arqyly anyqtalǵan jastar arasynan 800 adam saýalnamadan ótip, áleýmettik zetteýge qatysqan.
«Sonyń qorytyndysy boıynsha NEET sanatyndaǵy 800 adamnyń 40,3% jumyssyz bolyp shyqty. Olardyń jumyssyz bolýynyń basty sebepteriniń biri - jumys izdeýge degen nıettiń joqtyǵy emes, joǵary jalaqysy bar laıyqty jumystyń bolmaýy. Atalǵan sanattaǵy jastar bizdiń basty nazarda», - deıdi E.Baltabekov.
Aıta keteıik, osy jyldyń ekinshi toqsanynyń qorytyndysy boıynsha óńirde NEET jastarynyń sany - 5,8% qurap otyr. Bul kórsetkish respýblıkalyq deńgeıden aıtarlyqtaı tómen (QR boıynsha - 6,7%). Al jastar jumyssyzdyǵynyń deńgeıi - 3,4%-dy qurap otyr.