ShQO-da janarmaı baǵasyna qatysty qaıda shaǵymdanýǵa bolady

ÓSKEMEN. QazAqparat – Shyǵys Qazaqstan oblysynyń turǵyndary janarmaı baǵasyna qatysty shaǵymdana alatyn arnaıy paraqsha ashyldy, dep habarlaıdy QazAqparat tilshisi.

ShQO boıynsha ekonomıkalyq tergeý departamentiniń málimetine súıensek, óńirde janar-jaǵarmaı baǵasynyń kúrt qymbattaýyna jáne qoldan tapshylyq jasalýyna jol bermes úshin baqylaý kúsheıtilgen.

«Baǵany turaqtandyrý jáne birkelki etý, halyqtyń aryz-shaǵymdaryna birden jaýap berý maqsatynda jumys toby quryldy. Memlekettik organdar men kásipkerlerge Energetıka mınıstriniń kúshine engen buıryǵynyń negizgi erejeleri túsindirilip jatyr, onda munaı ónimderin bólshek saýdada ótkizýdiń jańa baǵalary jazylǵan», - delingen aqparatta.

Azamattar janar-jaǵarmaı baǵasynyń negizsiz qymbattaýyna shaǵymdana alýy úshin Instagram áleýmettik jelisinde @dervko_monitoring_gsm akkaýnty ashylǵan. Sonda jazylǵan ár aryz boıynsha tolyqqandy tekserý jumystary júrgizilmek.

Eske salsaq, Energetıka mınıstrligi elimizde benzın men dızel otynynyń baǵasy ósetinin habarlaǵan edi.