ShQO-da jańa týǵan nárestelerge ulttyq kıim tartý etildi

ÓSKEMEN. QazAqparat. Shyǵys Qazaqstan oblysy Aıagóz aýdandyq ortalyq aýrýhanasynda Naýryz meıramyna oraı nárestelerge ulttyq naqyshtaǵy kıimder syıǵa berildi, dep habarlaıdy QazAqparat tilshisi.

Ulttyq kıimder dúnıege kelgen 5 sábıdiń aýrýhanadan shyǵý rásimine oraı tabystaldy. Sondaı-aq analarǵa Naýryz kóje taratyldy. Bul erekshe sharaǵa aýrýhana ákimshiligi sebepker bolyp otyr.

«Ekinshi balamdy osy Aıagóz aýdandyq ortalyq aýrýhanasynda dúnıege ákeldim. Búgin perzenthanadan shyǵar kezde dárigerlerdiń ózderi ulttyq kıim kıip, balalarymyzǵa da qazaqtyń ulttyq naqyshta bezendirilgen kıimderin syıǵa tartty. Erekshe áser alyp, qýanyp qaldyq», - deıdi Úrjar aýdanynan kelgen ana Saıajan Sársenǵalı.

Aıta keteıik, nárestelerge arnalǵan ulttyq kıimderdi syıǵa tartý kezinde barlyq sanıtarlyq talaptar saqtalǵan.