ShQO-da jaǵdaı tolyq baqylaýǵa alyndy – Danıal Ahmetov

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Óskemen jáne Semeı qalalarynda oblystyń iri kásiporyndary men mekemeleriniń, sondaı-aq bank qurylymdarynyń ókilderimen keńes ótkizdi. QazAqparat bul týraly oblys ákimdiginiń baspasóz qyzmetine silteme jasap habarlaıdy.

Keńes kúntártibinde óńirdegi jaǵdaıdy odan ári turaqtandyrý, ShQO turǵyndaryna jalaqy, zeınetaqy men járdemaqylardy ýaqytyly berý máseleleri talqylandy.

Danıal Ahmetov atap ótkendeı, qazir jaǵdaı tolyq baqylaýǵa alynǵan. Barlyq ónerkásiptik kásiporyndar, dúkender, dárihanalar men medıtsına mekemeleri komendanttyq saǵatty ustana otyryp jumys isteýde. Aımaqta azyq-túlik qory jetkilikti, azyq-túlik taǵamdaryn irkilissiz jetkizý boıynsha barlyq sharalar qabyldanýda. Bul rette, baǵa spekýlıatsııasyna jol berilmeıdi.

Budan bólek, oblys turǵyndary tólem kartalarynan aqsha sheship alý úshin bankomattarda aqsha kólemi jetkilikti. Ekinshi deńgeıli bankter shtattyq rejımde jumys istep tur.

Shyǵysqazaqstandyqtarǵa barlyq qajetti tólemdi jasaý úshin óńirde qarajat bar.

Sondaı-aq ákim ınternettiń qoljetimsizdigine baılanysty jaǵdaıǵa túsinik berdi. Munyń sebebi, ınternet terrorıster úshin kommýnıkatsııa jáne aqparat almasýdyń, olardyń is-qımylyn úılestirýdiń quraly bolyp tabylady. Danıal Ahmetov atalǵan qolaısyzdyqqa túsinistikpen qaraýǵa shaqyrdy jáne ınternet Qazaqstannyń barlyq derlik óńirinde joq ekendigin atap ótti.

ShQO Polıtsııa departamentiniń málimetinshe, polıtsııa jáne áskerı qyzmet qatarynan 25 qyzmetker jaraqat aldy, 13 mashına jáne 1 polıtsııanyń 1 modýldik posty órteldi. Qazir shyǵyn kólemi eseptelýde, tergeý júrip jatyr. Sol sebepti ózge aqparat jarııalanýǵa jatpaıdy.

D.Ahmetov oblys turǵyndaryn arańdatýshylyqqa ermeýge jáne rastalmaǵan aqparat taratpaýǵa shaqyrdy.