ShQO-da izdeýde júrgen qylmysker qoldanǵan telefony arqyly Almatyda ustaldy

<p>ÓSKEMEN. KAZINFORM &ndash; Shyǵys Qazaqstan oblysynda izdeýde júrgen qylmysker qoldanyp júrgen telefony arqyly Almaty qalasynda ustaldy.</p>

Oblysta jyl basynan beri izdeýde júrgen 7 qylmysker ustaldy. Sonyń nátıjesinde, izdeýdegi qylmyskerler sany 35 paıyzǵa azaıǵan. Al ótken bir jyldyń ishinde 15 qylmysker quryqtalǵan. 

«ShQO prokýratýrasynyń jedel-izdestirý qyzmetiniń zańdylyǵyn qadaǵalaý basqarmasy qylmystyq qýdalaý organdarynyń qylmyskerlerdi izdestirý jónindegi jumysyn úılestirip, kómektesýde. Atap aıtqanda, oblys prokýratýrasynyń tekserýi kezinde urlyq jasaǵany úshin sot úkimi boıynsha jazasyn óteýden jaltaryp, probatsııa qyzmetiniń izdeýindegi adam aqparattyq júıeler arqyly qoldanyp júrgen telefon nómiri boıynsha anyqtaldy», - dep habarlady prokýratýranyń baspasóz qyzmetinen.

Júrgizilgen jedel-izdestirý sharalarynyń nátıjesinde ol Almaty qalasynda ustalyp, jazasyn odan ári óteýge jiberildi.

«Osy jyldyń naýryz aıynda prokýratýra ShQO polıtsııa departamentimen birlesip júrgizgen reıdter barysynda izdeýde júrgen 4 qylmysker ustap, habar-osharsyz ketken 5 adamdy tapty», - delingen aqparatta.