ShQO-da zańsyz aýlanǵan 20 tonnaǵa jýyq balyq tárkilendi
ShQO polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Brakoner» jedel-aldyn alý sharasyn júrgizýde. Ondaǵy maqsat – zańsyz ańshylyqtyń jáne balyq aýlaýdyń jolyn kesý.
«Shara barysynda polıtsııa qyzmetkerleri Tarbaǵataı aýdanynyń aýmaǵyndaǵy respýblıkalyq mańyzy bar «Omby-Maıqapshaǵaı» tasjolynyń 29-shaqyrymynda júk kóligin toqtatqan. Óskemen qalasynyń 58 jastaǵy turǵyny tizgindegen kólikte zańsyz aýlanǵan 20 tonnaǵa jýyq kókserke men taban balyq tabyldy. Osynyń saldarynan tabıǵatqa keltirilgen jalpy shyǵyn 116 mıllıon teńgeden asyp otyr», - delingen aqparatta.
Er adamǵa qatysty QR QK-niń 335-baby 1-bóligimen sotqa deıingi tergeý amaldary bastaldy. Ol 3 jylǵa deıingi merzimge bas bostandyǵynan aıyrylýy múmkin.
Eske salsaq, osyǵan deıin ShQO turǵynynyń kóliginen zańsyz aýlanǵan 6 myńnan astam tiri shaıan tabylǵanyn habarlaǵan edik.