ShQO-da Yrǵyzbaı ata kesenesin abattandyrýǵa 50 mln teńge bólindi

ASTANA. QazAqparat - Shyǵys Qazaqstan oblysynyń ákimi Danıal Ahmetov jáne «Nur Otan» partııasy Tóraǵasynyń birinshi orynbasary Muhtar Qul-Muhammed Tarbaǵataı aýdanyndaǵy shyǵystyń kıeli orny Yrǵyzbaı ata kesenesine baryp, abattandyrý jumystarynyń barysymen tanysty, dep habarlaıdy QazAqparat aımaq basshysynyń baspasóz qyzmetine silteme jasap.

El aýzyndaǵy ańyzǵa qaraǵanda, Yrǵyzbaı kıeli mekeninde bolǵan ár adam búkil aýrý-syrqatynan qulan taza aıyǵady. Bul jerge ártúrli elden adamdar syıyný jáne tazarý úshin keledi. Olardyń kópshiligi kıeli oryn aýmaǵyn kórkeıtýge óziniń qaıyrymdylyq úlesin qosyp ketedi. Týrısterdiń qarjysyna kesene jańa kelbet alyp, janynan 2 myńnan astam sırek kezdesetin jáne kóne kitaptar jınaqtalǵan kitaphana, shaǵyn meshit, qonaqúı, sondaı-aq qundy eksponattar jınaqtalǵan murajaı boı kóterdi. Qasıetti orynnyń qaraýshysy Bolat Taǵabaıdyń sózine qaraǵanda, ol kóp jyldardan beri jınalyp qalǵan artefaktilerdi memleket menshigine ótkizedi.

­«Oblystyq bıýdjetten qarjy bólindi, jaqyn kúnderi barlyq jóndeý jumystaryn aıaqtaý qajet, al murajaı kesheni jetildiriletin bolady», - dedi Danıal Ahmetov.

Qazirgi ýaqytta kıeli orynnyń aýmaǵy kórkeıtilýde. Qazan aıynyń aıaǵyna qaraı fontan salý, aınalasyn qorshaý jáne elektr jelisin ótkizý josparlanýda.

Aıta keteıik, Yrǵyzbaı ata kesenesi Shyǵys Qazaqstannyń kıeli oryndarynyń tizimine kiredi jáne «Rýhanı jańǵyrý» aımaqtyq baǵdarlamasyna engen.