ShQO-da veıp satqandarǵa qatysty 11 qylmystyq is tirkeldi
ShQO polıtsııa departamenti baspasóz qyzmetiniń málimetine súıensek, Rıdder qalasynda jedel ýákilder 900-den astam veıp satpaq bolǵan kúdiktilerdi ustady.
«21 jastaǵy kúdiktini «taýardy» jergilikti turǵynǵa satyp jatqan kezinde ustaǵan. Er adam qoıma retinde paıdalanǵan ǵımarattan shamamen 10 mıllıon teńge turatyn 916 elektrondy temeki tárkilendi. Atalǵan derek boıynsha sotqa deıingi tergeý bastaldy», - delingen aqparatta.
Aıta keteıik, bıylǵy 20 maýsymnan bastap jańa zań kúshine engennen keıin Shyǵys Qazaqstan oblysynyń polıtseıleri 2200-den astam veıp, 540-tan astam hosh ıistendirgish pen suıyqtyq, 54 temeki ónimi, 240 kartrıdj jáne 56 býlandyrǵyshty tárkiledi.
Sol ýaqyttan beri 11 qylmystyq is tirkelip, 4 is boıynsha aıyptaý úkimi shyqty. Kinálilerdiń árqaısysyna 150 AEK (553 800 teńge) kóleminde aıyppul salyndy.
Eske salsaq, osyǵan deıin Qytaıdan Qazaqstanǵa veıp ákelgen Qyrǵyzstan azamaty sottalǵany habarlanǵan.