ShQO-da úleskerlerdiń 1,8 mlrd teńgesin jymqyrǵandar qamaýǵa alyndy

<p>ASTANA. KAZINFORM &ndash; Qarjy monıtorıngi agenttiginiń Shyǵys Qazaqstan oblysy boıynsha departamenti qurylys kompanııasynyń top menedjerleriniń zańsyz áreketin toqtatty. Olar kópqabatty turǵyn úı keshenin salamyz degen jeleýmen 1,8 mlrd teńge jymqyrǵan.</p>

Tergeý barysynda Óskemen qalasynda eki kúdikti qurylysqa qatysýǵa arnalǵan jalǵan kelisimsharttar jasap, 102 azamatty aldaǵany anyqtaldy.

Nátıjesinde qurylys nysany uzaq qurylysqa aınaldy. Merzimder birneshe ret uzartylǵanymen, turǵyn úı kesheniniń qurylysy aıaqtalmaǵan.

Kompanııalar úleskerlerdiń aqshalaı qarajatyn tartýǵa ruqsat qujattary bolmaǵandyqtan zań talaptaryn buzǵan.

Qazirgi ýaqytta kúdiktiler sottyń sanktsııasymen qamaýǵa alynyp, tergeý ızolıatoryna ornalastyryldy.

Tergeý barysynda kúdiktilerdiń 2,3 mlrd teńge turatyn múlkine tyıym salyndy. Zardap shekkenderge qarajatty qaıtarý boıynsha jumys júrgizilýde.

Qazaqstan Respýblıkasynyń Qylmystyq is júrgizý kodeksiniń 201-babyna sáıkes basqa málimetter jarııalanýǵa jatpaıdy.

- QMA azamattardy úlestik qurylysqa qatysýshylardyń aqshalaı qarajatyn, resýrstaryn jáne materıaldyq-tehnıkalyq bazasyn tartýǵa tıisti ruqsat qujattary joq kompanııalarǵa aqsha qarajatyn salmaýǵa shaqyrady. Eger ekonomıkalyq quqyq buzýshylyqtar týraly aqparat bilseńiz, «AFM Insider» telegram-botyna habarlasyńyz, - delingen habarlamada.

Osyǵan deıin Qarjy monıtorıngi agenttiginiń 103 mlrd teńge bıýdjet qarajatyn únemdeýge kómektesken týraly jazdyq.